Máyap a óras! Kaluat a panaun ibat king pékataulîng paskil kéning dangkâ támu. Bustan yung ipatalastas ku ya kékayu iting báyung app a makásaup karing bísâng manigáral Kulitan, ing matuang súlat Kapampángan.
Píkatsá neng Keith Liam Manalótó iting “LEARN KULITAN”, métung a app a mángitangkâng makabáyung daklat para karing kayanakan at sikákatáûng Kapampángan at é Kapampángan bán panigarálan anting pamuklat ing Kulitan. Iting app búnga né ning sípágan na’t pakamal king kabiasnang Kapampángan at king amánu táng sísûan. I Manalótó táû ya Kuliat (Ángeles City) at méyárî yang BS Computer Science king Universidad ning Pilipínas – Los Baños, at iting app yang méguing tésis na king kayang kúrsu. Úli na níti, tinggap nó ring galal a Best Research Paper Award at míbílang ya king Honor Roll ning kayang batch.
Iting mésábing app maliári yu yang á-download king Google Play (bit.ly/LearnKulitanAndroid) pára karing Android users at king AppStore (bit.ly/LearnKulitanApple) pára karing iOS Apple users.
Katakatang kapugáyan at máyap a óras, Keith, kaníting matagumpéng pangimut at dáké mu king lálú na pang ikagambul at ikasaplálâ ning Kapampángan! Luid!
– ing Anak ning Aláya